BUCHIANA (Faisalabad):
Dilchian gaon mein aik dil dehla dene wala waqia samne aaya hai jahan aik manshiat ka aadi shohar ne apni biwi ko goli maar kar halaak kar diya aur apni 17 saal ki beti ko bhi goli maar kar shadeed zakhmi kar diya. Waqia us waqt hua jab us ne biwi se “ice” drug ke liye paisay maange, aur rad jawab milne par jhagra shuru ho gaya.
Police zaraaye ke mutabiq, mulzim Azam, jo ke ice ka aadi hai, waqia ke baad mauqa-e-wardaat se farar ho gaya. Nasreen Bibi, jo ke Landianwala ke Dilchian gaon ki rehaishi thi, raat ko apne ghar mein so rahi thi jab Azam ne us se manshiat ke liye paisay talab kiye. Biwi ke inkar par Azam ne us par goli chala di jo sar mein lagi aur us ki moqa par hi maut ho gayi.
Waqia ke baad jab 17 saal ki beti Kiran ne goliyon ki aawaz suni to wo bahar ayi, lekin Azam ne uspe bhi faaring kar di jisse wo shadeed zakhmi ho gayi.
Police team, Jaranwala se Rescue 1122 ke sath moqa-e-wardaat par pohanchi aur zakhmi larki ko foran aspatal muntaqil kiya gaya jabke Nasreen Bibi ki laash ko Tehsil Headquarters Hospital, Jaranwala post-mortem ke liye bhej diya gaya.
Police ke mutabiq, mulzim ki talash jaari hai aur ilaaqay mein chhaape maar kar usay giraftar karne ki koshish ki ja rahi hai. Maamlay mein further tahqiqat jaari hai.
